ಕೊರಟಗೆರೆ :-ಸಿಡಿಲಿನ ಆರ್ಭಟಕ್ಕೆ ಮನೆಯೊಂದು ಜಖಂಗೊಂಡು ವಿದ್ಯುತ್ ಉಪಕರಣಗಳು ಭಸ್ಮವಾಗಿ ಇಡೀ ಮನೆಯ ವೈರಿಂಗ್ ಹಾನಿಗೊಳಗಾಗಿರುವ ಘಟನೆ ತಾಲೂಕಿನ ಕಳ್ಳಿಪಾಳ್ಯದಿಂದ ವರದಿಯಾಗಿದೆ.
ಮಂಗಳವಾರ ಮುಂಜಾನೆ ಸುರಿದ ಬಾರಿ ಮಳೆಯ ಜೊತೆಗೆ ಸಿಡಿಲಿನ ಆರ್ಭಟವು ಜಾಸ್ತಿಯಾಗಿ ಸೋಮಣ್ಣ ಎಂಬುವವರ ಮನೆಗೆ ಸಿಡಿಲು ಬಡಿದಿದೆ.ಮನೆಯವರು ಸವಿನಿದ್ರೆಯಲ್ಲಿ ಇದ್ದಾಗ ಈ ಘಟನೆ ಘಟಿಸಿದ್ದು ಮನೆಯ ಮೇಲ್ಚಾವಣಿ ಸೇರಿದಂತೆ ವಿದ್ಯುತ್ ಉಪಕರಣಗಳು ಹಾಗು ಇಡೀ ಮನೆಯ ವಿದ್ಯುತ್ ವೈರಿಂಗ್ ಸುಟ್ಟು ಕರಕಲಾಗಿದೆ.
ಮನೆಯ ಸದಸ್ಯರುಗಳಿಗೆ ಅದೃಷ್ಟವಶಾತ್ ಯಾವುದೇ ಸಮಸ್ಯೆಗಳಾಗಿಲ್ಲ.ಸರಿಸುಮಾರು ಒಂದು ಲಕ್ಷ ರೂಪಾಯಿಗೂ ಹೆಚ್ಚು ಮೊತ್ತದ ಸ್ವತ್ತು ಹಾನಿಗೆ ಒಳಗಾಗಿದ್ದು ಸಂಬಂಧ ಪಟ್ಟ ಇಲಾಖೆ ಪರಿಹಾರ ಒದಗಿಸಿಕೊಡಬೇಕು ಎಂದು ಮನೆಯ ಮಾಲೀಕ ಸೋಮಣ್ಣ ಆಗ್ರಹಿಸಿದ್ದಾರೆ.ನಾವು ಬಡ ರೈತ ಕುಟುಂಬದವರಾಗಿದ್ದು ಮನೆಯ ಮೇಲ್ಚಾವಣಿಯ ಜೊತೆಗೆ ಕಷ್ಟ ಪಟ್ಟು ಕೊಂಡಿದ್ದ ಉಪಕರಣಗಳು ಜಖಂ ಗೊಂಡಿದ್ದು ಶೀಘ್ರ ಪರಿಹಾರ ನೀಡಬೇಕೆಂದು ಅವರು ತಾಲೂಕು ಆಡಳಿತಕ್ಕೆ ಮನವಿ ಮಾಡಿಕೊಂಡಿದ್ದಾರೆ.