ಕೊರಟಗೆರೆ-ಮಾಜಿ ಜನಪ್ರಿಯ ಸಚಿವ ಸಿ ಚಿನ್ನಿಗಪ್ಪನವರ ಪುತ್ರ ಡಿ.ಸಿ ಅರುಣ್ ಕುಮಾರ್ ಮುಂದಿನ ಜಿಲ್ಲಾ ಹಾಗೂ ತಾಲೂಕು ಪಂಚಾಯಿತಿ ಚುನಾವಣೆಗಳಿಗೆ ಜೆ.ಡಿ.ಎಸ್ ಪಕ್ಷದಿಂದ ಯಾರೇ ಸ್ಪರ್ಧಿಸಿದರೂ ತನು,ಮನ,ಧನ ಸಹಾಯಗಳ ಮೂಲಕ ಅವರ ಗೆಲುವಿಗೆ ಟೊಂಕ ಕಟ್ಟಿ ನಿಲ್ಲುವುದಾಗಿ ಭರವಸೆ ನೀಡಿದರು.
ಶುಕ್ರವಾರ ಕೊರಟಗೆರೆ ತಾಲೂಕಿನ ಕ್ಯಾಶವಾರ ಗ್ರಾಮದ ಶ್ರೀ ಆಂಜನೇಯ ಸ್ವಾಮಿ ಹಾಗೂ ಮಾರಮ್ಮ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿ ನೆರೆದಿದ್ದ ಪಕ್ಷದ ಕಾರ್ಯಕರ್ತರನ್ನು ಉದ್ದೇಶಿಸಿ ಮಾತನಾಡಿದರು.
ಮುಂದಿನ ದಿನಗಳಲ್ಲಿ ದೇವೇಗೌಡರು ಹಾಗು ಕುಮಾರಸ್ವಾಮಿಯವರ ಆಶೀರ್ವಾದದೊಂದಿಗೆ ಕ್ಷೇತ್ರದಲ್ಲಿ ಜೆ.ಡಿ.ಎಸ್ ನ ಬೆಳವಣಿಗೆಗೆ ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರೊಂದಿಗೆ ಶ್ರಮಿಸುವುದಾಗಿ ತಿಳಿಸಿದರು.
ಕೊರಟಗೆರೆ ಕ್ಷೇತ್ರದಲ್ಲಿ ಹ್ಯಾಟ್ರಿಕ್ ಗೆಲುವು ಸಾಧಿಸಿ ಸಚಿವರಾಗಿ ಕೊರಟಗೆರೆ ಭಾಗದ ಜನರ ಮನ ಗೆದ್ದು ಮನೆಮಗ ಎಂಬುವ ರೀತಿಯಲ್ಲಿ ಜನರೊಟ್ಟಿಗೆ ಬೆಳೆದ ಸಿ ಚಿನ್ನಿಪ್ಪನವರ ಅಭಿಮಾನಿಗಳು ಕ್ಷೇತ್ರದಲ್ಲಿ ಬಹಳಷ್ಟು ಜನರಿದ್ದಾರೆ.ನಮ್ಮ ಪೂಜ್ಯ ತಂದೆಯವರಾದ ಸಿ . ಚೆನ್ನಿಗಪ್ಪನವರ ಹಾದಿಯಲ್ಲಿಯೇ ನಾನು ಸಹ ಬಡವರ ಪರವಾಗಿ ದೀನ ದಲಿತರ ಸಮಸ್ಯೆಗೆ ಸ್ಪಂದಿಸಿ ಕ್ಷೇತ್ರದ ಜನತೆಗೆ ಹಾಗೂ ಧಾರ್ಮಿಕ ಕಾರ್ಯಕ್ರಮಗಳಿಗೆ ಕೈಲಾದ ಸಹಾಯ ಮಾಡುವುದರ ಜೊತೆಗೆ ಕ್ಷೇತ್ರದ ಅಭಿವೃದ್ಧಿಯ ಬಗ್ಗೆ ಕಾಳಜಿ ವಹಿಸುವುದಾಗಿ ಹೇಳಿದರು.
ಕ್ಯಾಶವಾರ ಗ್ರಾಮ ನಮ್ಮ ತಂದೆ ಕಾಲದಿಂದಲೂ ನಮ್ಮ ಕುಟುಂಬವನ್ನ ಹೆಚ್ಚು ಗೌರವಿಸಿ ಹಚ್ಚಿಕೊಂಡಂತ ಗ್ರಾಮ. ನಮ್ಮ ತಂದೆಯವರಿಗೆ ಈ ಗ್ರಾಮದಲ್ಲಿ ಅತಿ ಹೆಚ್ಚು ಮತ ಬೀಳುತ್ತಿದ್ದವು.ಗ್ರಾಮಸ್ಥರು ನಮ್ಮ ತಂದೆ ಹಾಗೂ ನಮ್ಮ ಕುಟುಂಬದವರ ಮೇಲೆ ಇಟ್ಟಿರುವ ಅಭಿಮಾನ ಅದರ ಋಣ ತೀರಿಸುವ ದೃಷ್ಟಿಯಿಂದ ನಮ್ಮ ತಂದೆ ಚಿನ್ನಿಗಪ್ಪ ಹಾಗೂ ತಾಯಿಯವರ ಹೆಸರಿನಲ್ಲಿ ಈ ಗ್ರಾಮದಲ್ಲಿ ಆಂಜನೇಯ ಸ್ವಾಮಿ ದೇವಸ್ಥಾನ ಜೀರ್ಣೋದ್ಧಾರಕ್ಕೆ ಹಣ ಸಹಾಯ ಮಾಡಲಾಗಿದೆ.
ಗ್ರಾಮಸ್ಥರು ದೇಣಿಗೆಗಾಗಿ ನನ್ನ ಬಳಿ ಬಂದಂತ ಸಂದರ್ಭದಲ್ಲಿ ನಾನು ಕೈಲಾದ ಸಹಾಯ ಮಾಡಿದ್ದು, ದೇವಸ್ಥಾನ ಪೂರ್ಣಗೊಂಡಿದ್ದು ಉದ್ಘಾಟನಾ ಸಂದರ್ಭದಲ್ಲಿ ನನಗೆ ಸ್ವಲ್ಪ ಅನಾರೋಗ್ಯವಿದ್ದ ಕಾರಣ ಬರಲು ಸಾಧ್ಯವಾಗಿರಲಿಲ್ಲ.
ಗ್ರಾಮದ ಮುಖಂಡರುಗಳು ದೇವಾಲಯಕ್ಕೆ ಒಂದು ಬಾರಿ ಬನ್ನಿ ಎಂದು ಮನವಿ ಮಾಡಿದ ಹಿನ್ನೆಲೆಯಲ್ಲಿ ಈ ದಿನ ದೇವಸ್ಥಾನದ ಪೂಜಾ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದೇನೆ.ನಮ್ಮ ತಂದೆಯವರು ಈ ಗ್ರಾಮದ ಮೇಲಿಟ್ಟಿರುವ ಅಭಿಮಾನದ ರೀತಿಯಲ್ಲಿಯೇ ನಾನು ಸಹ ತಾಲೂಕಿನ ಪ್ರತಿ ಗ್ರಾಮಗಳ ಮೇಲೆ ಅಭಿಮಾನವಿಟ್ಟು ಕೈಲಾದ ಸಹಾಯ ಮಾಡುವುದಾಗಿ ತಿಳಿಸಿದರು.
ಚನ್ನಪಟ್ಟಣ ಚುನಾವಣೆಯಲ್ಲಿ ನಿಖಿಲ್ ಕುಮಾರಸ್ವಾಮಿ ಸರಿಸುಮಾರು 25,000ಕ್ಕೂ ಹೆಚ್ಚು ಮತಗಳ ಅಂತರದಿಂದ ಗೆಲುವು ಸಾಧಿಸಲಿದ್ದಾರೆ.ನಾನು ಸಹ ಕೆಲವು ಮುಖಂಡರುಗಳ ಜೊತೆಯಲ್ಲಿ ಇಡೀ ಕ್ಷೇತ್ರ ಸುತ್ತಿದ್ದೇನೆ.ಕುಮಾರಸ್ವಾಮಿ ಅವರ ಮೇಲೆ ಮತದಾರರಿಗೆ ಬಹಳಷ್ಟು ಒಲವಿದೆ, ನಿಖಿಲ್ ಸ್ವಾಮಿ ಗೆಲುವು ಖಚಿತ ಎಂದು ಭವಿಷ್ಯ ನುಡಿದರು.
ಈ ಸಂದರ್ಭದಲ್ಲಿ ಮಾಜಿ ತಾಲೂಕ್ ಪಂಚಾಯಿತಿ ಸದಸ್ಯರಾದ ಹನುಮಂತ ರಾಯಪ್ಪ, ವಡ್ಡಗೆರೆ ಗಂಗಣ್ಣ, ಗುಂಡಿನಪಾಳ್ಯ ನಟರಾಜು ಹಾಗೂ ಪಾರ್ಥಣ್ಣ, ಕ್ಯಾಶ್ ವಾರ ಮಂಜಣ್ಣ ,ಲೋಕೇಶ್,ಮಂಜುನಾಥ್,ಊರಿನ ಗ್ರಾಮಸ್ಥರಾದ ಮಂಜುನಾಥ್, ನಾರಣಪ್ಪ, ಮಲ್ಲಣ್ಣ, ಲಕ್ಷ್ಮೀಶ, ಕ್ಯಾತಪ್ಪ, ನಾರಣಪ್ಪ, ನಂಜಪ್ಪ, ಬ್ರಹ್ಮಚಾರ್, ದೊಡ್ಡರಾಮಣ್ಣ, ಸೇರಿದಂತೆ ನೂರಾರು ಗ್ರಾಮಸ್ಥರು ಉಪಸ್ಥಿತರಿದ್ದರು.
—————-ಶ್ರೀನಿವಾಸ್ ಕೊರಟಗೆರೆ