ಚಿಕ್ಕಮಗಳೂರು-ಕರುನಾಡ ಚಕ್ರವರ್ತಿ ಡಾ|| ಶಿವರಾಜ್‌ಕುಮಾರ್ ಅಭಿನಯದ ಬಹುನಿರೀಕ್ಷಿತ ಭೈರತಿ ರಣಗಲ್ ಚಿತ್ರ ಶುಕ್ರವಾರ ತೆರೆಕಂಡ ಹಿನ್ನೆಲೆ ಅಪ್ಪು ಯೂತ್ ಬ್ರಿಗೇಡ್ ನ ಪದಾಧಿಕಾರಿಗಳು ದೇವಾಲಯಕ್ಕೆ ತೆರಳಿ ವಿಶೇಷ ಪೂಜೆ ಹಾಗೂ ಹಿರಿಯರಿಗೆ ಗೌರವಿಸುವ ಮೂಲಕ ಸಂಭ್ರಮಾಚರಣೆ ನಡೆಸಿದರು.
ಬಳಿಕ ಮಾತನಾಡಿದ ಬ್ರಿಗೇಡ್ ಅಧ್ಯಕ್ಷ ಪ್ರದೀಪ್, ದೇಶದಾದ್ಯಂತ ಅಭಿಮಾನ ಬಳಗವನ್ನು ಹೊಂದಿರುವ ಶಿವರಾಜ್‌ಕುಮಾರ್ ಇನ್ನಷ್ಟು ಹೆಚ್ಚಿನ ಚಿತ್ರಗಳಲ್ಲಿ ನಟಿಸಿ ಜನಸಾಮಾನ್ಯರ ಮನಸೂರೆಗೊಳಿಸಬೇಕು.ಆರೋಗ್ಯದಿಂದ ಸದಾ ಎಲ್ಲರನ್ನು ರಂಜಿಸಬೇಕು ಎಂದು ಬೋಳರಾಮೇಶ್ವರ ದೇವಾಲಯದಲ್ಲಿ ವಿಶೇಷ ಪೂಜೆ ಸಲ್ಲಿಸಲಾಯಿತು ಎಂದರು.
ಈಗಾಗಲೇ ಸತತ ಎಂಟು ವರ್ಷಗಳಿಂದ ದೊಡ್ಮನೆ ಕುಟುಂಬದ ಕುಡಿಗಳ ಚಿತ್ರಗಳು ತೆರೆಗೆ ಬಂದಲ್ಲಿ ಚಿತ್ರಮಂದಿರದ ಸಿನಿಪ್ರೇಕ್ಷಕರಿಗೆ ಸಿಹಿ ಹಂಚುವುದು, ಕಲಾರಂಗ, ಕನ್ನಡ ಹೋರಾಟಗಾರರು, ನಿವೃತ್ತ ಯೋಧರು ಹಾಗೂ ಅಗ್ನಿಶಾಮಕದಳ ಸಿಬ್ಬಂದಿಗಳಿಗೆ ಗೌರವಿಸುವ ಕಾರ್ಯ ಮಾಡಲಾಗುತ್ತಿದೆ ಎಂದು ಹೇಳಿದರು.
ಡಾ|| ರಾಜ್‌ಕುಮಾರ್ ಇಡೀ ಕುಟುಂಬ ಕಲೆಯನ್ನು ಆವರಿಸಿರುವ ಅವಿಭಕ್ತ ಕುಟುಂಬ. ಪುನೀತ್ ರಾಜ್‌ಕುಮಾರ್, ಶಿವರಾಜ್‌ಕುಮಾರ್, ರಾಘವೇಂದ್ರರಾಜ್‌ಕುಮಾರ್ ಹಾಗೂ ಮೊಮ್ಮಕ್ಕಳ ಬಳಗದಿಂದ ಸಿನಿರಂಗದಲ್ಲಿ ಹೆಚ್ಚಿನ ಸಾಧನೆ ಮಾಡಿ ಕಲಾದೇವಿಯನ್ನು ಆರಾಧಿಸುತ್ತಿದ್ದಾರೆ ಎಂದು ತಿಳಿಸಿದರು.
ಗೌರವ ಸ್ವೀಕರಿಸಿ ಮಾತನಾಡಿದ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಎ.ಎನ್.ಮೂರ್ತಿ, ಕನ್ನಡ ಚಿತ್ರರಂಗದಲ್ಲೇ ಡಾ|| ರಾಜ್ ಕುಟುಂಬದ ಸೇವೆ ಅವಿಸ್ಮರಣೀಯ.ಅಲ್ಲದೇ ಪ್ರತಿ ಚಿತ್ರಗಳಲ್ಲಿ ತಮ್ಮದೇ ಶೈಲಿಯಲ್ಲಿ ಸಮಾಜಕ್ಕೆ ಹಾಗೂ ಯುವಸಮೂಹಕ್ಕೆ ಸಂದೇಶ ನೀಡುವ ಚಿತ್ರಗಳಲ್ಲಿ ಅಭಿನಯಿಸಿ ಜನಮನ್ನಣೆಗಳಿಸಿದ್ದಾರೆ ಎಂದು ಬಣ್ಣಿಸಿದರು.
ಗೌರವ ಸ್ವೀಕರಿಸಿ ಮಾತನಾಡಿದ ಪತ್ರಕರ್ತ ಅನಿಲ್‌ ಆನಂದ್, ನಾಡಿನ ಹೆಮ್ಮೆಯ ಕಲಾವಿದ ಹಾಗೂ ನೆಚ್ಚಿನ ನಟ ಶಿವರಾಜ್‌ಕುಮಾರ್ ಚಿತ್ರ ರಾಜ್ಯದ ಎಲ್ಲಾ ಮಂದಿರಗಳಲ್ಲಿ ಶತದಿನೋತ್ಸವ ಆಚರಿಸುವ ಮೂಲಕ ಜನತೆಯ ಮನಸೂರೆಗೊಳಿಸುವಂತಾಗಲೀ ಎಂದು ಹಾರೈಸಿದರು.
ಇದೇ ವೇಳೆ ಡಾ|| ರಾಜ್‌ಕುಮಾರ್ ಅಭಿಮಾನಿ ಬಳಗದ ಅಧ್ಯಕ್ಷ ಓಂಕಾರೇಗೌಡ ಹಾಗೂ ಚಿತ್ರ ಮಂದಿರ ಸಿಬ್ಬಂದಿ ಹನುಮಂತಯ್ಯ ಅವರಿಗೆ ಗೌರವಿಸಲಾಯಿತು.
ಈ ಸಂದರ್ಭದಲ್ಲಿ ಬ್ರಿಗೇಡ್‌ನ ಪ್ರಧಾನ ಕಾರ್ಯದರ್ಶಿ ಶಿವು, ಸದಸ್ಯರಾದ ಜಯರಾಮ್, ಶಶಿ, ಪ್ರಜ್ವಲ್, ರಂಜಿತ್, ರವಿ ಹಾಗೂ ಸಿನಿಪ್ರೇಕ್ಷಕರು ಹಾಜರಿದ್ದರು.