ರಾಮನಾಥಪುರ (ಅರಕಲಗೂಡು ತಾಲೂಕು): ಅರಕಲಗೂಡು ತಾಲೂಕಿನಲ್ಲಿ ಪ್ರಮುಖ ಧಾರ್ಮಿಕ ಸ್ಥಳವಾದ ರಾಮನಾಥಪುರದ ಶ್ರೀರಾಮೇಶ್ವರಸ್ವಾಮಿ ದೇವಸ್ಥಾನದ ಪಕ್ಕವಿರುವ ಕಾವೇರಿ ನದಿಯ ಒಂದು ಪರ್ಲಾಂಗ್ (ಸುಮಾರು 200 ಮೀಟರ್) ಭಾಗವನ್ನು ಮತ್ಸ್ಯ ಸಂರಕ್ಷಿತ ಪ್ರದೇಶವೆಂದು ಮೈಸೂರು ವಿಭಾಗದ ಮೀನುಗಾರಿಕೆ ಇಲಾಖೆಯ ಜಂಟಿ ನಿರ್ದೇಶಕ ಆರ್. ಗಣೇಶ್ ಪ್ರಕಟಿಸಿದರು.
ಬುಧವಾರದಂದು ಹಾರಂಗಿಯಿಂದ ತಂದಲಾದ 5 ಸಾವಿರ ಮಹಶೀರ್ (ಬಿಳಿಮೀನು) ಮೀನು ಮರಿಗಳನ್ನು ನದಿಗೆ ಬಿಡುವ ಕಾರ್ಯಕ್ರಮವನ್ನು ಆರಂಭಿಸಿ ಮಾತನಾಡಿದ ಅವರು, “ಈ ಪ್ರದೇಶವು ಮಹಶೀರ್ ಸೇರಿದಂತೆ ಅಪಾಯದಲ್ಲಿರುವ ವಿವಿಧ ಮೀನುಗಳ ಪ್ರಾಕೃತಿಕ ವಾಸಸ್ಥಾನವಾಗಿದ್ದು, ಇವುಗಳನ್ನು ಸಂರಕ್ಷಿಸುವುದು ನಮ್ಮ ನೈತಿಕ ಕರ್ತವ್ಯವಾಗಿದೆ. ಈ ಪ್ರದೇಶದಲ್ಲಿ ಮೀನು ಹಿಡಿಯುವುದು, ಸಿಡಿಮದ್ದು ಅಥವಾ ವಿಷಕಾರಕ ದ್ರವ್ಯಗಳಿಂದ ನದಿಯನ್ನು ಕಲುಷಿತಗೊಳಿಸುವುದು ನಿಷಿದ್ಧ,” ಎಂದು ಹೇಳಿದರು.
ಪರಿಸರ ಸಂರಕ್ಷಣೆಗೆ ನಿಖರ ನಿಯಮಗಳು:
ಭಕ್ತರು ಸಂರಕ್ಷಿತ ಮತ್ಸ್ಯಗಳಿಗೆ ಪುರಿ, ಕಡಲೆಕಾಯಿ, ಹಿಂಡಿ ಮುಂತಾದ ಆಹಾರವನ್ನು ಹಾಕಬಹುದಾದರೂ, ಪ್ಲಾಸ್ಟಿಕ್, ಗೋಣಿಚೀಲ, ತ್ಯಾಜ್ಯ ವಸ್ತುಗಳನ್ನು ನದಿಗೆ ಬಿಡುವುದು ಕಾನೂನುಬಾಹಿರವಾಗಿದೆ. ನಿಯಮ ಉಲ್ಲಂಘಿಸಿದರೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಗಣೇಶ್ ತಿಳಿಸಿದ್ದಾರೆ.
ಈ ಮತ್ಸ್ಯ ಸಂರಕ್ಷಣೆ ಕಾರ್ಯಕ್ರಮದಲ್ಲಿ ಹಾಸನ ಜಿಲ್ಲಾ ಮೀನುಗಾರಿಕೆ ಉಪನಿರ್ದೇಶಕರಾದ ನಂಜುಂಡಪ್ಪ, ಹಾರಂಗಿ ವಿಭಾಗದ ನಿರ್ದೇಶಕ ಸಚೀನ್, ಅರಕಲಗೂಡು ಸಹಾಯಕ ನಿರ್ದೇಶಕ ಕೃಷ್ಣ, ಕಾವೇರಿ ನದಿ ಸ್ವಚ್ಚತಾ ಆಂದೋಲನದ ಜಿಲ್ಲಾಧ್ಯಕ್ಷ ಎಂ.ಎನ್. ಕುಮಾರಸ್ವಾಮಿ, ಪ್ರಧಾನ ಕಾರ್ಯದರ್ಶಿ ಕಾಳಬೋಯಿ, ಖಜಾಂಚಿ ರಘ, ತಾಲ್ಲೂಕು ಅಧ್ಯಕ್ಷ ಸಿದ್ದರಾಜು, ಖಜಾಂಚಿ ಕೇಶವ್ ಸೇರಿದಂತೆ ಹಲವು ಗಣ್ಯರು ಪಾಲ್ಗೊಂಡು ನದಿಗೆ ಮೀನು ಮರಿಗಳನ್ನು ಬಿಟ್ಟರು.
– ಶಶಿಕುಮಾರ